Oblystyq mýzeıde «Alash» partııasynyń 100 jyldyǵyna arnalǵan «Alash. Bostandyq habarshylary» atty kórme jumys isteı bastady.
«Kórme «Alash» partııasynyń jumysymen, onyń alǵa qoıǵan maqsattarymen jáne mindetterimen tanystyrý, jas urpaqty belsendi azamattyq turǵyda tárbıelep, otansúıgishtikke baýlý, Táýelsizdigimizdiń qundylyqtaryn nasıhattaý maqsatyn kózdeıdi», deıdi óńirlik mýzeı birlestiginiń dırektory Gúlnara Muqysheva.
Kórmeniń ashylý saltanatyna «Nur Otan» partııasynyń ókilderi, eńbek ardagerlery, ǵalymdar, áskerı ınstıtýttyń kýrsanttary, jastar qatysty.
«Alash» qazaq ulttyq partııasyn qurý týraly sheshim Orynbor qalasynda ótken I Búkilqazaq sezinde qabyldanǵan. A.Baıtursynov, Á.Bókeıhanov, M.Shoqaı, M.Dýlatov sekildi ulttyq qozǵalys basshylary qazaq memlekettiliginiń negizin qalap, uıymdastyrý jumystarymen aınalysqan. Saıası uıym baǵdarlamasynda Qazaqstannyń avtonomııa bolýy, jalpylyq saılaý quqyǵy, sóz, basylym bostandyǵy, jeke adamnyń derbes pravolylyǵy, agrarlyq saıasat, taǵy basqa kóptegen saıası, ekonomıkalyq, áleýmettik máseleler qamtylǵan.
«Alash qozǵalysy», «Negizin qalaýshylar jáne ıdeologtar», «I-shi Búkilqazaq sezi. «Alash» partııasynyń qurylýy», «II Búkilqazaq sezi», «Alash-Orda Úkimeti», «Soltústikqazaqstandyqtar - «Alash» partııasynyń músheleri» taqyryptary boıynsha fotoqujattar, materıaldar tamashalandy. Alashtyń aqıyq aqyny M.Jumabaev jaıly qundy jádigerler qoıyldy.
О́mir Esqalı,
«Egemen Qazaqstan».
Soltústik Qazaqstan oblysy